An Oifig Lóistín

Ceisteanna Coitianta faoi Lóistín

Conas is féidir liom calaois/caimiléireacht cíosa a sheachaint agus mé ag cuardach lóistín príobháideach?​

Cuardach Cliste

Is é Studentpad an bealach is sábháilte chun lóistín príobháideach do mhic léinn a chuardach. Ní dhéanfaidh tiarna talún an chéad teagmháil leat ar Studentpad riamh. Ní bheidh do shonraí ar fáil don tiarna talún/úinéir tí nó go mbeidh teagmháil dhíreach déanta agat leo ar dtús. Ba cheart duit smaoineamh ar na leideanna seo a leanas i gcónaí agus tú ag cuardach lóistín ar aon ardán, Studentpad san áireamh.

Is fadhb í calaois chíosa atá ag éirí níos coitianta, agus díríonn caimiléirí ar mhic léinn go háirithe. Tá mic léinn idirnáisiúnta go háirithe i mbaol airgead a chailleadh nuair a aistrítear éarlaisí chuig tiarnaí talún ionchasacha gan an lóistín a fheiceáil go pearsanta. Molaimid go láidir do gach mac léinn gan aon airgead a aistriú go dtí go mbeidh an lóistín feicthe go pearsanta acu. Buail le tiarna talún ionchasach sa lóistín atá le ligean ar cíos i gcónaí. Tabhair leat cara agus coinnigh cóipeanna de gach comhfhreagras.

Níl ar do thiarna talún comhaontú tionóntachta a sholáthar go dlíthiúil, ach is fearr le formhór na dtionóntachtaí príobháideacha a gcearta agus a bhfreagrachtaí a bheith leagtha amach i gcáipéis oifigiúil. Bí cinnte go dtuigeann tú do chomhaontú cíosa agus go bhfuil an cháipéis iomlán léite agat sula síníonn tú í. Cinntigh go bhfuil tú soiléir maidir lena bhfuil san áireamh sa chíos, mar shampla billí fóntais nó bruscair. Seiceáil go n-oireann na heochracha, go nglasálann agus go n-osclaíonn na doirse, agus go bhfuil an conradh cíosa sínithe, sula n-íoctar éarlais.

Má bhíonn an chuma ar an scéal go bhfuil sé rómhaith le bheith fíor, seans go bhfuil.  Bí airdeallach ar lóistín a fhógraítear faoi bhun an mheánphraghais cíosa, go háirithe nuair a bhíonn íomhánna breátha le feiceáil san fhógra gan mórán eolais. Uaireanta úsáideann caimiléirí íomhánna nach mbaineann leo, mar sin coinnigh súil amach d'íomhánna ginearálta/stoc-íomhánna nó sonraí a bhaineann go sonrach le láthair ar leith ar a n-áirítear soicéid nach n-úsáidtear in Éirinn a léiríonn nach bhfuil an lóistín lonnaithe i nGaillimh.

De ghnáth ní dhéanfaidh tiarna talún dlisteanach nó gníomhaire ligin an méid seo a leanas:

• Teagmháil a dhéanamh le mic léinn ar dtús, nó cumarsáid a dhéanamh trí théacs, WhatsApp nó ar na meáin shóisialta. 
• A rá leat nach féidir leo an lóistín a thaispeáint duit go pearsanta. 
• Earráidí seasta a dhéanamh ina gcomhfhreagras leat nó eolas neamhréireach a chur ar fáil. 
• Éarlais nó cíos míosa a iarraidh ort chun an lóistín a chinntiú gan comhaontú cíosa oifigiúil. I gcás lóistín úinéir-áitithe, ní gá don tiarna talún comhaontú tionóntachta a sholáthar, ach tá sé tábhachtach na bunrialacha a aontú maidir le tréimhse an lóistín agus b’fhéidir gur mhaith leat iad seo a chur i scríbhinn chun mearbhall a sheachaint amach anseo. 
• Brú a chur ort airgead a aistriú gan an t-eolas ábhartha go léir a sholáthar. 
• Lóistín a thairiscint gan aon cheist a chur agus íocaíocht a éileamh láithreach. 

Ba cheart do thiarna talún dlisteanach nó gníomhaire ligin an méid seo a leanas a dhéanamh: 

• Comhaontú cíosa a sholáthar (lóistín príobháideach), nó a léiriú go soiléir céard atá san áireamh sa chíos. Tabhair faoi deara: i gcás lóistín úinéir-áitithe, nach bhfuil aon oibleagáid ar thiarnaí talún comhaontú nó bunrialacha soiléire a sholáthar, ach moltar é seo a phlé le do thiarna talún sula mbogann tú isteach, agus moltar na rialacha seo a chur i scríbhinn chun aon mhearbhall a sheachaint lá níos faide anonn. 
• Cinntigh go bhfuil an lóistín feicthe agat agus go bhfuil an comhaontú cíosa sínithe (lóistín príobháideach) sula n-iarrfar éarlais ort. Is féidir leat tuilleadh eolais a fháil maidir le calaois cíosa a sheachaint ón nGarda Síochána agus ón gCoimisiún um Iomaíocht agus Cosaint Tomhaltóirí.

Coinnigh cuntas de gach rud

Íoc an éarlais leis an tiarna talún amháin – ní leis an duine atá ag fágáil na háite – agus cinntigh go n-íoctar an éarlais trí úsáid a bhaint as dréacht bainc nó aistriú bainc. Coinnigh cóipeanna d’admhálacha ar íocaíochtaí agus d’aon chomhfhreagras. Faigh admháil dhlisteanach i scríbhinn ar aon íocaíocht a dhéanann tú.

Nuair a bhíonn tú ag bualadh le tiarna talún ionchasach sa lóistín, iarr grianghraf aitheantais oifigiúil ar an tiarna talún/gníomhaire ligin (pas nó ceadúnas tiomána), agus tóg grianghraf den cháipéis seo.

Bíodh do chearta ar eolas agat

Ná tabhair aon airgead ar láimh mura bhfuil tú sásta le riocht na háite.

Déan liosta den troscán agus de na fearais ar fad i dteannta an tiarna talún. Má tá aon obair dheisiúcháin le déanamh, iarr ar an tiarna talún gealltanas a thabhairt duit i scríbhinn go ndéanfar an obair dheisiúcháin sin – tóg grianghraif agus déan cinnte iad a shábháil in áit shábháilte. Is féidir leat níos mó eolais a fháil faoi chuardach lóistín go sábháilte ón mBord um Thionóntachtaí Cónaithe, an Garda Síochána agus Threshold.ie.

Chun tuilleadh eolais a fháil faoi do chearta mar thionónta i lóistín príobháideach nó i lóistín úinéir-áitithe, cliceáil anseo.

Cén uair ba chóir duit tosú ag cuardach lóistín?​

Glactar le hiarratais d’áiteanna cónaithe do mhic léinn ar an gcampas agus lasmuigh den champas araon i mí Feabhra do mhí Mheán Fómhair, agus fanann siad ar oscailt ar feadh cúpla seachtain. Glacann na Soláthraithe Lóistín lasmuigh den champas, Westwood agus Swuite, le hiarratais ó thús mhí na Nollag agus mí Eanáir. Is smaoineamh maith é clárú do nuachtlitir na soláthraithe lóistín chun foláirimh a fháil maidir le dátaí agus spriocdhátaí tábhachtacha.

Má tá lóistín príobháideach á lorg agat, molaimid duit teacht go Gaillimh go luath sa samhradh chun áiteanna a fheiceáil. 

An féidir liom scéalta ó mhic léinn eile a fuair lóistín a léamh?​

Cliceáil anseo chun teistiméireachtaí ó mhic léinn eile a léamh. 

Is mac léinn idirnáisiúnta mé. An féidir liom lóistín a chur in áirithe ó mo thír dhúchais?​

Molaimid gan airgead a sheoladh chuig tiarna talún go dtí go bhfeiceann tú an áit go pearsanta. ​​

Má tá tú ag taisteal go Gaillimh ó thar lear, is féidir leat lóistín gearrthéarmach a chur in áirithe (cosúil le leaba agus bricfeasta nó brú óige) nuair a thagann tú i dtosach, ansin breathnaigh ar áiteanna sula n-íocfaidh tú éarlais. Molaimid áiteanna a eagrú agus teacht go Gaillimh i bhfad roimh an téarma, lena chinntiú go bhfuil lóistín deimhnithe agat in am trátha.​​

Aon leideanna maidir le bheith ag roinnt tí go sásúil le daoine eile?

1. Cuimhnigh cloí le treoirlínte FSS maidir le Covid-19 i gcónaí lena chinntiú go bhfanann an ollscoil agus an pobal i gcoitinne slán agus sábháilte.
2. Bí soiléir ón tús: bíodh róta aontaithe agaibh don ghlanadh agus aontaigh ar pholasaí maidir le cuairteoirí.
3. Ná tóg aon rud ar iasacht ó do chomrádaí gan ceist a chur ar dtús.
4. Tabhair aghaidh ar fhadhbanna beaga ar bhealach measúil sula n-éiríonn siad níos mó.
5. Bíonn spásanna roinnte le roinnt ag cách. Ná fág do chuid rudaí ar fud na háite.
6. Bí cairdiúil ach ní gá a bheith thíos i bpócaí a chéile.
7. Bealach iontach chun bualadh le daoine is ea rudaí nua a thriail.
8. Caith le do chomrádaí mar a bheifeá ag súil go gcaithfí leat. I bhfocail eile, léirigh meas! 
9. Íoslódáil an aip OurHome: bealach iontach chun tascanna agus liostaí grósaeireachta a bhainistiú i measc do chomhpháirtithe tí. Ar fáil do iOS, Android & Webapp.

 

Lóistín ar an gCampas

An bhfuil lóistín ar an gcampas ar fáil?

Féach anseo chun an t-eolas is déanaí a fháil faoi áiteanna cónaithe ar an gcampas ar a n-áirítear Baile na Coiribe, Baile an Chíorbhuí agus Baile na Breacóige.

Ní mholaimid do mhic léinn a bheith ag brath ar dhaoine lóistín a chur ar ceal dá lóistín le linn am téarma. Tá roghanna eile le scrúdú thíos.

An bhfuil seomraí ar fáil i lóistín ar an gcampas do mhic léinn faoi mhíchumas?

Tá. Tá líon teoranta áiteanna ar fáil i lóistín ar an gcampas; ní féidir na háiteanna seo a mholadh ach amháin do mhic léinn a mbeadh a dtinreamh thíos leis go mór, mar gheall ar thionchar a míchumais, dá mbeidís ina gcónaí lasmuigh den champas. Tugtar tús áite do mhic léinn ar gá dóibh cónaí i lóistín inrochtana e.g. duine a úsáideann cathaoir rothaí, nó mac léinn le lagú amhairc a mbeadh sé an-deacair air/uirthi taisteal chuig an gcoláiste.

Déan teagmháil le disabilityservice@universityofgalway.ie chun tuilleadh eolais a fháil.

Cén costas atá ar lóistín ar an gcampas?​

Le haghaidh liosta iomlán rátaí i mBaile na Coiribe, Baile an Chíorbhuí agus Baile na Breacóige, cliceáil anseo.​​

Lóistín lasmuigh den Champas

Céard iad na príomhleideanna nár chóir dearmad a dhéanamh orthu agus tú ag cuardach lóistín

• Téigh chuig Studentpad 
  
  An bealach is sábháilte chun lóistín príobháideach do mhic léinn a chuardach. Déantar gach áit a fhógraítear a chur trí phróiseas clárúcháin agus déantar iad a nuashonrú go rialta.

• Cuardaigh cliste
  
  Buail le tiarna talún ionchasach i gcónaí sa lóistín atá le ligean ar cíos, tabhair cara leat agus cuimhnigh cóipeanna den chomhfhreagras a choinneáil. Déan cinnte go bhfuil comhaontú cíosa ann a thuigeann tú agus a léigh tú ina iomláine. Sínigh an conradh roimh éarlais a íoc. Fan ar an eolas faoi do chearta tionóntachta.
  
  Déan liosta den troscán agus de na fearais ar fad i dteannta an tiarna talún. Má tá aon obair dheisiúcháin le déanamh, iarr ar an tiarna talún gealltanas a thabhairt duit i scríbhinn go ndéanfar an obair dheisiúcháin sin – tóg grianghraif más gá. Is féidir leat níos mó a fhoghlaim faoi shábháilteacht tionóntachta ón mBord um Thionóntachtaí Cónaithe, an Garda Síochána agus Threshold.ie. 

• Cén buiséad atá agat?
  
  Smaoinigh ar do chostais lena n-áirítear taisteal, billí agus bia agus tú ag oibriú amach cé mhéad le caitheamh ar lóistín. Féach anseo chun léargas ginearálta a fháil ar chostais mhaireachtála i nGaillimh.

• Céard atá san áireamh sa chíos?
  
  Agus do bhuiséad á oibriú amach agat, déan cinnte a sheiceáil an bhfuil billí san áireamh i rátaí cíosa, ionas gur féidir leat é seo a chur san áireamh i do bhuiséad.

• Tosaigh chomh luath agus is féidir
  
  Mar gheall ar an nganntanas lóistín ar fud na hÉireann, is fiú duit do chuid roghanna a bheachtú anois. 

Conas is féidir liom lóistín príobháideach a chuardach go sábháilte?​

• Go hidéalach, déileáil le gníomhaireachtaí cíosa bon-fide seanbhunaithe amháin.​

• Buail le tiarna talún ionchasach sa lóistín atá le ligean ar cíos i gcónaí.​

• Iarr comhartha aitheantais (ceadúnas tiomána nó comhartha aitheantais i bhfoirm grianghraf) ar an tiarna talún/gníomhaire ligin (glac grianghraf den cháipéis).​

• Íoc an éarlais leis an tiarna talún amháin – ní leis an duine ata ag fágáil na háite.​

• Úsáid seiceanna nó dréachtaí bainc chun an éarlais a íoc. Coinnigh cóipeanna d’admhálacha d’íocaíochtaí agus d’aon chomhfhreagras.​

• Cinntigh go n-oireann na heochracha, go nglasálann agus go n-osclaíonn an doras, agus go sínítear conradh cíosa, sula n-íoctar éarlais.​ 

Fainic calaois cíosa. Féach na leideanna tábhachtacha ón mBord um Thionóntachtaí Cónaithe, an Garda Síochána agus Threshold.ie.
Is féidir leat comhairle a fháil freisin ar do chearta anseo.

An bhfuil tithe cónaithe príobháideacha cóngarach lasmuigh den champas?​

1. Dúnáras ​
   (26 nóiméad ag siúl go dtí an campas, 8 nóiméad ar rothar)​

2. Gort na Coiribe​
   (18 nóiméad ag siúl go dtí an campas, 6 nóiméad ar rothar)​

3. Árasáin Pháirc Mhionlaigh​
   (26 nóiméad ag siúl go dtí an campas, 10 nóiméad ar rothar)​

4. Cúirt Donegan ​
   (13 nóiméad ag siúl go dtí an campas, 4 nóiméad ar rothar)​

5. Árasáin Atlantis ​
   (16 nóiméad ag siúl go dtí an campas, 6 nóiméad ar rothar)​

6. Swuite ​
   (26 nóiméad ag siúl go dtí an campas, 7 nóiméad ar rothar)​

7. An Westwood ​
   (26 nóiméad ag siúl go dtí an campas, 6 nóiméad ar rothar)​

8. Cathair na Gaillimhe ​
   (21 nóiméad ag siúl go dtí an campas, 7 nóiméad ar rothar)
   
   

Cén costas atá ar lóistín lasmuigh den champas?​

Seomraí ar cíos/ Lóistín Pobail​

Maidir le seomra ar cíos nó lóistín pobail, íocann mic léinn úinéir tí as lóistín a thairgtear ar bhonn lánaimseartha nó ar bhonn cúig lá (ag brath ar úinéir an tí). Tá seomraí ar cíos ar fáil ar fud chathair na Gaillimhe agus sna ceantair máguaird. Tá roinnt úinéirí tí sásta béilí a chur ar fáil, agus is fearr le daoine eile rochtain a thabhairt dá gcuid mac léinn ar an gcistin chun a gcuid bia féin a réiteach. Athraíonn praghsanna, de ghnáth idir €150 agus €250 in aghaidh na seachtaine (billí san áireamh go minic).

Cé na ceantair i nGaillimh is fearr do shaol an mhic léinn?

Cé go mb’fhéidir gurb é lár na cathrach do chéad rogha, tá ceantair chónaithe éagsúla eile ann i nGaillimh agus neart le tairiscint acu. Tuilleadh eolais le fáil fúthu seo anseo.

Táim ag freastal ar Choláiste Ósta na Sionna. Céard iad na roghanna lóistín atá agam?

Má tá tú sa chéad bhliain ag staidéar i gColáiste Ósta na Sionna, tá lóistín ar fáil i nGairdíní an Chaisleáin i mbaile Bhun Raite. Tá gach gné den lóistín seo á bhainistiú ag cuideachta phríobháideach, Rent an Irish Cottage MGMT Ltd.

Má tá tú i mbliain 3 nó 4, tá lóistín ar fáil i mBun Raite Thiar i mbaile Bhun Raite, arna bhainistiú ag Rent an Irish Cottage chomh maith. Is féidir leat tuilleadh teagmhálaithe maidir le lóistín príobháideach a fháil anseo.

Is féidir leat roghanna a scrúdú freisin ar Studentpad, inneall cuardaigh iontaofa maidir le lóistín príobháideach do mhic léinn. Faoin gceannteideal “Campas” roghnaigh “Coláiste Ósta na Sionna”. I measc na bhfoinsí eile do lóistín príobháideach tá Daft.ie, Rent.ie agus MyHome.ie – ach, moltar a bheith cúramach. Ná scar le haon airgead go dtí go mbeidh an áit feicthe agat go pearsanta.

Le haghaidh tuilleadh cúnaimh déan teagmháil leis an Oifigeach i Seirbhísí do Mhic Léinn, April ag april.rushe@universityofgalway.ie. 

Cliceáil anseo chun tuilleadh eolais a fháil faoi lóistín i gColáiste Ósta na Sionna.